Diru laguntzarik gabe utzi gaitu euskaltegiak UPNren gobernuak
BERRIA egunkaritik hartua (eta pixka bat moldatua)
2013ko aurrekontuetan 245.000 euroko diru sail bat onartuta zegoen, baina AEK-k eta IKAk ez dute sosik jaso iaztik.
Urtzi Urkizu
«Urte bat baino gehiago egin dugu deus kobratu gabe, eta, gainera, ez
digute erabakiaren berri eman». Helios del Santo Nafarroako AEKren
bozeramaileak Iruñean atzo adierazi zuenez, 2013ko aurrekontuetan
Nafarroako Gobernuak 245.000 euroko diru sail bat onartua zuen
AEKrentzat eta IKArentzat. «Baina 2012ko urritik gaur arte ez dugu euro
bakar bat ere jaso, UPNren gobernuak ez baitu diru laguntzak banatzeko
deialdirik egin nahi izan». Horrez gain, euskaltegietarako diru laguntza
kudeatzeko gobernuak zuen teknikaria kendu egin dute.
Badira 40 urte AEK eta IKA zerbitzu publikoa eskaintzen ari direla,
«herritar guztiek duten euskara ezagutu eta erabiltzeko eskubidea
eginkor egiteko bitartekoak eskainiz». Agerraldian azaldu dutenez,
azkeneko inkestek diote Nafarroan gero eta euskal hiztun gehiago
daudela. Euskaltegien lanari esker neurri handi batean. Baina orain arte
herri ekimeneko euskaltegiei ematen zieten diru laguntza «zirtzilak»
kendu egin dituzte. Laguntzak beti kostuetatik oso urrun ibili direla
gogorarazi dute, eta urtetik urtera gero eta txikiagoak direla. Zerora
iritsi arte. «UPNren gobernuak plangintza txikienik ere ez du egin inoiz
euskara ikasi nahi duten heldu guztiak euskaldundu gaitezen».
Euskaltegietako ordezkariek jakinarazi dutenez, Nafarroako Gobernuak
sekula ez du «taxuzko» sustapen kanpainarik egin.
Irakaskuntzan D
ereduaren aurka egiten, euskarazko hedabideak laguntzarik gabe uzten
eta udalerrietako euskara zerbitzuetan euskara teknikarien lana
«kili-kolo» jartzen ari da gobernua, AEK-ko eta IKAko kideen ustez.
«Euskarabidek daraman hizkuntza politika ere negargarri eta
suntsitzailea da», esan du Del Santok. Jose Iribas Nafarroako hezkuntza
kontseilariarekin bilera bat eskatua dute.
Egoera horren guztiaren berri gizarteari emateari ekin diote
euskaltegietako ordezkariek. Halaber, abenduaren 11n elkarretaratzea
antolatu dute Nafarroako Gobernuaren egoitzaren inguruan. 12:00etan
izango da protesta. «Zor digutena eskatzeko».
Nahiz eta erakunde
publikoen babesik ez izan, Nafarroako herritarren erantzunarekin pozik
daudela azaldu du Nafarroako AEK-ren bozeramaileak: «Herritarrak
hurbildu dira beste behin euskaltegietara. Beste askotan bezala, jendeak
erantzun egin du. Nahiz eta gobernuaren asmoa gu itotzea den, lanean
tinko eta irmo jarraituko dugu».
.JPG)
.JPG)
