Topagunea euskaltzaleen federazioak Irakurri, gozatu eta oparitu
egitasmoaren bederatzigarren edizioa jarri du martxan, euskara
elkarteen, liburutegi publikoen eta liburu dendekin batera eta Sakanako
Mankomunitatearen babesarekin. Liburuaren Nazioarteko Egunean,
apirilaren 23an, abiatu eta ekainaren 30era arte iraungo du.
Kanpainaren izenak berak ongi argi adierazten duenez, hiru pausu eman behar dira bertan parte hartzeko:
1. Irakurri.
Lehenengo pausoa irakurtzea da. Horretarako, herriko liburutegira joan,
eta euskarazko edozein liburu maileguan eskatu ahal izango duzu.
2. Gozatu.
Liburua irakurri, liburutegira bueltatu, eta fitxa bat bete beharko
duzu. Fitxa hori beteta, liburutegiko arduradunak erosketa-txekea emango
dizu, Sakanako honako liburu denda hauetan erabiltzeko: Arkatz,
Beriain, Kaxeta, Liburunda eta Martxueta.
3. Oparitu.
Azken pausua, liburua opari egitea da: lagun bati, senide bati, edo
norbere buruari. Liburutegian jasotako txartelarekin, euskarazko beste
edozein libururen erosketan %25eko beherapena izango duzu, —%50 Sakanako
euskalgintzako talde bateko kidea (BIERRIK fundazioko bazkidea esaterako) edo mintzakidea izanez gero.
Ekainaren
30era arte egongo da liburutegietan erosketa-txekeak lortzeko aukera,
eta uztailaren 11ra arte txartel horiek liburu dendan erabiltzeko.
